Reisebricht vom Seniore-Usflug
D’ Alterhyner Zwetschgechilbi isch kum verbi, scho hend d’Seniore und d’Seniorinne wieder” d’Forthose” a! Mir hend en Ameldigsboge öbercho für dä Donnschtig 7. September zum alljöhrliche Usflug! Wo here das es goht wird aber nie verrote. Nur d’ ID oder dä Pass mues wieder mitgnoh werde.
Mir hend diä Papier scho mengmol nöd brucht aber üsers Ziel isch ebe immer gheim. Also ich mue sägä, hüt hät alles gschtimmt s’Wetter, d’Wärmi, dä schö Car, die ufgschtellte “alte” Lüt und au dä fründlich Carschofför. Am 12.20 isch denn diä Schar bim Ahoi igschtige, hät ihri Plätz gsuecht und los isch es gange. Zerscht simmer s’Rhytal duruf und plötzlich hät dä Schofför links abgschwenkt. Jetzt hemmer gwüsst es goht em Bodesee längs am dütsche Ufer gege Weschte. D’Uswis hemmer nöd brucht, mir hend ebe ganz brav und friedlich usgseh!! Ganz gmüetlich hät üs dä Thomas schoffiert, mir hend all diä schöne Obschtalage, diä viele Wyberg, schöne Städtli chöne a üs verbri go loh.
Mir sind scho recht lang g’fahre und immer wieder hemmer grötled, wo gömmer ächt here? Wird’s Friedrichshafe, wirds Meersburg oder Konstanz? Mir wüsseds nöd. Aber mir werded orientiert: mir fahred jetzt en schöne grosse Buurehof in Überlinge a und döt gits zerscht emol Kafi und Chueche! Wo mir acho sind häts schö deckti Tisch gha und dä heiss Filterkafi isch scho uf em Tisch gschtande. Dreierlei Obschtchueche hends denn no dezue serviert. Es isch eifach fein gsi.
Noch dere Stärkig simmer mit em Senior-Buur uf eme selbergmachte “Apfelzügle” durch d’Öpfelplantage gfahre. Vorne hät er üs mit eme starke Traktor zoge. Viel hemmer erfahre über Öpfel wo mir gar nöd gwüsst hend. Zum Bispiel dass d’Hochstämmer nöd Vorfahre vom Spalierobscht gsi sind, sondern dass dä Öpfel ursprünglich ä Struchpflanze isch. Mä hät allerlei Sorte gmischt und so immer wieder neui Sorte übercho. Wil die Dütsche gern roti Öpfel essed hät mä halt Sorte züchted wo roti Öpfel git. Mä mues das Obscht jo au chöne guet vermarkte! Mit hend ghört wiä viel diä viele Netz choschted wo über die ganz Plantage zoge sind, wiä lang dass es goht bis mä en volle Ertrag cha ernte usw. 4 mol hemmer en Halt gmacht und immer häts luschtigs und interessants z’ghöre ge.
Noch eme Schluck z’trinke, noch em Ustrete und em Bsuech im Hoflädeli simmer churz vor em 5-i wieder in Car igschtige und hend dä Heiweg atrete. Wunderbar guet simmer gfahre, kei Stau, en guete Schofför und d’Freud ufs Nachtesse het üsi Lune hochghalte. Am 7-i simmer wohlbehalte uf em Poschtplatz Alterhy glandet. D’Lüt sind schnell us em Car gschtige, ich glaub alli hend ä chli Hunger g’ha. Im Jägerhus hemmer denn ä ganz feins Menue übercho : feini Spätzli ,Rüebli und Bluemechöhl und ä feins Chalbsgschnetzlets ! Es isch super guet gsi. Und zum Schluss no, wiä i guete alte Zite, ä ganz feins Caramelchöpfli !! Mir danked dä Ortsgmeind und dä Organisatorinne recht herzlich und freued üs scho jetzt uf’s nöchscht Johr !
Text: Seniorin Ruth Cavelty, Fotos: Organisatorin Vera Züst
